Friday, March 07, 2008

1930

1 9 3 0
طبعًا القهوة ليس لها اسم.. أنا والحسينى أطلقنا عليها هذا الاسم. عثرنا على القهوة صدفة فى ميدان الجيزة –خلف مستشفى الرمد- طبعًا الضوضاء والتلوث والزحمة لا تطاق فى الجيزة ولا فى أى مكان الصراحة. المهم يا معلم.. تدخل من كل ده تلاقى شارع مرشوش وهدوووووء وإذاعة الأغانى ومكان على الرصيف التانى متعرش وناس كبيرة فى السن وقليلين والبيوت تحس إنها هتقع عليك ومحل حلاقة جمب القهوة ما يعلم بيه إلا ربنا.. الدش شغال ومحدش بيتفرج عليه، لدرجة إن مباريات كأس العالم المشفرة كانت الناس بتدبح بعض على كرسى فاضى ف القهاوى التانية والقهوة دى بتلعب طاولة وحوالى أربعة بيتفرجوا ولا كأنه نهائى كاس عالم
أول حاجة تعملها وانت داخل إنك بتنفض التراب اللى على كتفك.. إحساس حقيقى إنك رجعت لعهد الملك اللى بيقولوا عليه

الحاجة الوحيدة اللى بتحسسك إنك منتمى للعصر ده هو عم أحمد صاحب القهوة

.. فجأة سب دين وميتين وملل ونحل وعصر الطوائف ينهال من أحمد على الصبى الذى ينزل الشيش للزبائن.. لدرجة إننا قلنا إن أحمد سيقتل الصبى. وأخذ أحمد يكيل هذا السباب المتنقى للصبى ولأمه دون رد. ما الذى يدفع هذا الشاب ليتحمل كل هذا إلا إذا كان حمد ماسك عليه ذلة. لو كنت مكان الصبى لكسرت على دماغه الشيشة. إحساس بالرعب انتابنى والحسينى. قلنا: أكيد الليلة هتنتهى بجريمة. الغريب إن أحمد كان يسبه والمسافة بينهما أقل من ثلاثين سنتيمتر والصبى كان بالشكل الآتى: شكل اللمبى والمذيعة بتسأله عن السبب اللى خلاه بقى مجرم. والله العظيم بالمللى.. نظرة عينه وحركة دماغه ورد فعله البطئ.. كله كله.. وبمجرد أن توجه أحمد للنصبة ليستغفر ربنا ويهدأ من الواد بن ديـ.. وبن ميتـ.. وبن القحـ.. قال الواد للحسينى بمنتهى الدهشة: هوه حد كلمه ده. وعاد يقلب الفحم فى الراكية كأن لم يكن طالع ديكه منذ لحظات

.. .. .. الصراحة محدش على القهوة ألقى بالاً للحيثيات التى دفعت أحمد لأن يسلك هذا المسلك مع الصبى حامل الشيش. فجأة ويك ويك ويك ويا ولود الكذا كذا وبعد ذلك يقف أحمد مشعلاً سيجارة كليوباترا ويستند بعنفوان متداعى إلى النصبة.. بعد ذلك نظرت إليه فقال الصبى بابتسامة وهز رأسه بإشفاق وتفهم كبيرين: هوه كده على طول. الحسينى اتكوم وهستيريا ضحك انتابتنى وسألت الجالس إلى جوارنا: هوه ليه محدش اتحرك يا حاج ولا حد قام يحوش، ده أحمد كان هيقتل الواد. الرجل أخذ يكيل الشتائم للصبى. وقال: ده واد –يقصد الصبى- ابن .... مطلع عين أبوه. أبوه؟؟ أيوه أبوه ما هو أحمد يبقى أبو الواد ده. ياعينى مطلع عنين أبوه، أصله كان بيتعالج فى مصحة من الإدمان.. سمعنا من جديد سب ديك وفراخ وزجاج يتكسر.. نفخ الرجل دخان الشيشة وهز رأسه فى أسف حقيقى قائلاً: لا حول ولا قوة إلا بالله.. الواد ابن الـ... هيخلص على أبوه. بعد ذلك كلما أتينا إلى قهوة 1930 لم نعد نندهش حين يقترب أحمد بوجهه من وجه اللمبى متخفيًا فى صورة ابنه ويشتم بقوة.. بعد أن يهدأ نطلب حلبة وشاى فيأتينا بعدها بالطلب فى ثوانى ومبتسمًا ونرى من قريب ابنه يقلب الفحم مغمغمًا: هو حد كلمه ده.


آخر مرة قعدت فى قهوة 1930 كان بعد العصر من حوالى شهر.. طلبت شاى بالنعناع وكالعادة: مفيش نعناع يا بيه والله. طلبت حلبة. ظهر أحمد من الفراغ وبدأ فى وصلته. هذا البوست لا يكتمل إلا إذا جلستم على القهوة لتروا بأنفسكم أحمد وابنه. شعور حقيقى إن حالة قتل مريعة ستحدث الآن أمام عينيك. وبالطبع القتل لا يحدث. بعد أيام سأحدث هذا البوست إن شاء الله مضيفًا صور القهوة وصاحبها وابنه. وأرجو أن تكون الظروف سعيدة وأقدر أسجل فيديو للصبى وهو يقلب الفحم أو يتحدث مع الزبائن



12 comments:

متغيرة شوية said...

ليا الفخر طبعا بأول تعليق ، وليا الفخر كمان علشان قريت الموضوع قبل ما يتنشر على المدونة

بس بقولك ايه ، عايزاك توصفلي مكانها بالظبط ، انت عارف الجيزة دي حتتي ولازم ادرس قهاويها ، ده غير ان الجيزة كلها قرايبنا ، فممكن الراجل ده يطلع قريبنا من بعيد ولا حاجة

بس البوست جامد يا معلمي
كيب ذا جوود وورك

Hisham Anwer said...

2zayak ya 2abou kamal wallahi el3azeem wa7eshini gedan, 2ntah w el 7osaini el kbeer. ana ra2ee matro7sh henak be camera ya medo 27nah mi7tagenak, ana 5ayef tro7 henak matl2eesh el walad elli shabah ellembi w tla2i wlad 2abou isma3el :)

H

artellewa said...

لازم تعزمني علي واحد شاي و حجرين عالقهوة دي لما ارجع مصر.
واحشني جداٍ

إبـراهيم ... said...

أنا عبجتني الشتيمة المشفرة دي :فجأة ويك ويك ويك ويا ولود الكذا كذ
**************
الفكرة ف المواقف اللي زي دي يا زميل(كتابة ودراسة وتدوين ...وبلااااوي!!) إن الواحد بيبقى عاوز يلقط أو يصطاد، عشان يكتب ، إنتا ف التدوينة/الموضوع كده، حرقت الفكرة، أو تخلصت من -ربما-سيطرتها على دماغك، لكن هل يا ترى يمكنك صياغتها ف قصـة، أو رواية أخرى جديدة ؟؟؟


لك التحـيـــة
وساندوتش صبري ده أنا كنتش باكل منه
وبعدين أنا مش فاتحها ما يطلبه المعلقون :)


تحياااايت ،،، بالبطاطس
ألا صحيح شفت جروب (دخول) ذلك الجروب الفظيييع

Mohamed Kamal Hassan said...

سلمى صلاح
أنا اللى ليا الفخر إنك أول معلقة وأول واحدة قرته

أنا ممكن أقولك ع العنوان بس ببنى وبينك
أحسن أحمد واللمبى يكونوا حداثيين ويعلقونى على القهوة

بس وعد
لو اتقابلنا ف الجيزة هعديكى من عليها
((:
ـــــــــــــــ
هشام أنور
بيتهيألى إنك ممكن تكتب ف الأدب الساخر جدًا
مشكلة ولاد ابو اسماعين
انهم منتشرين ف كل حته

بس يا هشام لو شفت الواد ابن أحمد لا يمكن تفوته من تحت ايدك
دا يتعمل عنه دراسة
وحشتنى يا فقرى
ـــــــــــــــــــــــ
حمدى باشا رضاااااااا
يعنى اللوا
وأرض اللوا
وأرت اللوا
وسمعنى سلام عظيمة يا مصر يا أرض اللوا
مبسوووووووط إنك زرتنى
ولما ترجع مصر لازم أخعزمك هناك طبعًا
دا انت ممكن تعمل جاليرى هناك
الواد وابوه والحلاق والراديو
بس يارب ميكونش واحد خلص على رقبة التاى

زرنى دايمًا يا فنان
((:
ـــــــــــــــــــــــ
إبراهيم عادل
الزميل ومايسترو التدوين
طبعًا الفكرة اتحرقت
بس مين قالك انها اتحرقت
أنا بكسب تدوينة يعنى أدب سيرة ذاتية من وجهة نظرى
وممكن أكتبها ف قصة أو رواية
عادى
بس مين قالك انى هعمل كده
......
......
كمان انا مبسوك انك بتاكل من عند صبرى
بس مين قالك انها ما يطلبه المعلقون
وكمان مين قالك انى مشفتش الجروب

الله
إيه يا إبراهيم
مين قالك تيجى هنا
((:

Camellia Hussein said...

نياهاهاهاهاهاها
انا لازم اروح القهوة دي واشوف
احم...واسمع طبعا
الا صحيح يا كيمو انت ما ينفعش الظروف تبقي اسعد واسعد وتسجل فيديو لوصلة من وصلات الويك ويك ويك دي؟

واشمعني 1930 ليه مش فبراير1929مثلا يعني؟؟؟

إبـراهيم ... said...

هههههههههههههههه

ابقى سجل لها وصلة من وصلات الويك ويـك يا سيدي ، ناس نفسها تسمع شتيمة !!!


... يخرب بيت فقركو كلكووووو

و بعمر بيت غناكو ....


ده لو ليه بيت يعني


على فكرة أنا ماعديتش من هنـــا

Mohamed Kamal Hassan said...

كاميليا
بتوحشينى والله
مع إن زعلان منك جامد
زعلان حقيقى
بس بيتهيألى إنى لو قدرت أسجل وأذيع
فى كتير من قراء المدونة هايقطعونى
بقولك إيه
بيتهيألى تنضمى للجروب السياحى اللى طالع 1930
ــــــــــــــــ
إبراهيم
زيارتين ف الراس توجع
بس شرفتنى كتيير يا ريس
وده رغم الحقد الطبقى المتألق ف تعليقك
((:

Camellia Hussein said...

زعلان يا خراشي يا خراشي
طيب زعلان ليه بس يا فندم؟
انا اقدر برضه علي زعلك؟
ما تجيشي
بس زعلان ليه؟
قوللي صحيح الوفد طالع امتي علي 1930
طبعا هاجي وابقي اسجل انا بقي
;)

Mohamed Kamal Hassan said...

زعلان لأنى عرفت خبر ما متأخر جدًا
لو اتصلتى بيا هقولك
ولازم تتصلى
لأن موبايلى اتسرق
ومعاييش رقمك
((:
والجروب طالع بعد يوم 7 أبريل
وده جد مش هزار والله

Farfosha said...

الاختراع دة ظريف بس بيلخبط
فين التواريخ الكتابة الاحدث الاول ولا القديمة؟افيدونى يا أهل الخبرة

Mohamed Kamal Hassan said...

farfosh
التدوين أحلى حاجه حصلتلى من سنتين
عالم مفتوح

البوست اللى حضرتك بتكتبيه بيبقى الأول تلقائى

شرفتى مدونتنا المتواضعة
((: