Friday, May 08, 2009

سالومه الأقرع مايعرفش أخوه

سـالـومـه الأقــرع مـايـعــرفـش أخــوه






لا يذكر سرحان عبد البصير في "شاهد ماشافش حاجة" كثيرًا عن سالومه الأقرع. فقط أخبرنا أنه قضى معه ليلة في أوضة "متر× متر وربع" بصحبة الزميلين العزيزين: علي المفش وزكي بلاميطة. ترك لنا مهمة تخيل ذلك الـ(سالومه) خاصة وأن عين سرحان اليسرى موحية تمامًا بما فعله سالومه والمفش وبلاميطة.. أعتقد –مجرد اعتقاد- أن سرحان فقد بنطلونه فى تلك الليلة. لذا فلي الحق أن أتخيل سالومه الأقرع مايعرفش أخوه شبيهًا بزميل قديم أيام مدرسة "الأهرام الثانوية النموذجية بنين"، كنا نسميه "كامبا" حوالى 145سم ولديه اعتقاد جازم أنه مجرم حرب، ولديه استعداد بأن يثبت العفريت في المدينة. وإليه يُنسب دخول كلمتيّ "نفضله واحلقله" إلى مدرستنا البريئة، وأيضًا كلمة "إنزل من على وداني".. كامبا في رحلته لإثبات أنه مجرم كسب "أربع كابات" وأيضًا "سبعة أحزمة" كان يبيعهم لأوركر صديقه العتيد الذى يزوره قادمًا من مدرسة "أحمد لطفى السيد" بشارع الملك فيصل.لا شك أن كامبا حين كبر في السن صار هذا الرجل الذي أراه منذ سنوات بعيدة في موقف السيرفيس بالجيزة يعمل على خط جيزة- مشعل

كنت أسكن في فيصل من الفترة 1990 وحتى 2005 وأثناء تلك الفترة تعرفت إلى مجموعة لا بأس بها من سواقي الميكروباظ. كان منهم عم شاهين –الذي يعمل مخبرًا للحكومة في أوقات الفراغ- والذي كنت أحجز المقعدين الأماميين ليحكي لي باستمتاع عن زملائه وأحيانًا عن أم العيال.حكى لي عن سالومه لأنه أدرك أن الرجل استرعى انتباهي فانطلق:- سالومه كان عنده العجلة التويوتا أيام ما كان اللي يجيبها كإنه جاب مرشيدس. عليّ الحرام من ديني يا شيخ.. كان بيخش جيبه سنة 84 مش أقل من 80 جندي فى اليوم.- الرزق بتاع ربنا يا عم شاهين. - آه، بس لازم نشكر النعمة.ثم بصق من شباكه على الأرض أو على رجل –لا أذكر بالضبط-، واستكمل:- قوم سالومه عرف طريق الشم والبورشام لغاية ما باع العجلة، وبعدها دخل السجن في قضية تعاطي، وبعد ما طلع بقى كل شويه ياخدوه وبعدها رجعوه يمسك الموقف، ولما مشاكله كترت رجعوه سواق على الخط تاني.طبعًا ما حكاه لي شاهين إيجاز لا يخلو من خلل لتاريخ سالومه الأقرع مايعرفش أخوه. لأنني كنت أراقب سالومه منذ أن حكى لي عنه، وأحاول أن أسد الفراغات الزمنية في الحكاية

سالومه كان في كل مناسبة يخترع حوارات مع الزبائن ليخبرهم بفخر أنه توقف عن البورشام والشم وأنه يكتفي بالبانجو كل كام يوم، وأنه كذلك توقف عن شرب "الميه" نهائيًا ما عدا فى الأفراح "عشان يجامل".. سالومه استقبل أحد الركاب قائلاً:- مش علي دخل المدرسة- علي مين؟- علي ابني.- طب يا بني ألف مبروك.. ربنا يخليهولك


وفي أغسطس 2002 نظر في المرآة الأمامية ووجه إليّ الكلام أمام الجميع: - سلامو عليكو يا شيخ.- وعليكم السلام ورحمة الله وبركاته.- أنا ناوي أطلع عُمرة.- ألف ألف مبروك..- يعني دى حاجة كويسة؟ أطلع يعني؟- آه طبعًا.. اتوكل على الله يا راجل.. حد طايل.- طب ما تشوفلي معاك 200 جندى أكمل على حق التذكرة.فيما بعد عرفت أنه "ثبت" زمايله وجَمَّع حق التذكرة فعلاً، ثم عاد بعد شهر أقرع فأطلقوا عليه "سالومه الأقرع". كانت أسنانه نصف صفراء ونصف فارغة ونصف مبتسمة، وقال للسيدة التي ركبت معنا من شارع العريش:- مش تباركيلي يا حاجة.- مبروك يا ابني.. خير إن شاء الله.- مش أنا عملت عُمرة وبطلت بانجو.ثم أخبرني بعد نزول السيدة أن ما ينغص عليه حياته هو كلب الأسفلت


يبلغ كلب الأسفلت 32 سنة، وقال لـ(كالابالا) اللي ماسك الكارتة إنه دفع 40 ألف جنيه عشان يقبلوه في معهد أمناء الشرطة. شخر كالابالا وأنَّبه:- لو كنت جتلي ساعتيها كنا قضيناهالك على تلاتينايه ويمكن 25 كمان.- أرزاق بقى.. ماحدش بياخد أكتر من نصيبه.. هتوكل أنا عشان عندي مأمورية مع جمال باشا.وترك كالابالا وتركني أتابعه حتى غاب عني، إلى أن حكى شاهين أن كلب الأسفلت "دفع 55 ألف جنيه عشان يدخل المعهد بس بيتكسف يقول عشان ماحدش يتريق عليه".. أبوه شيخ من شربين وقطع علاقته بابنه أشرف/ كلب الأسفلت بعد التعيين. بدأ تعيينه فى منطقة نائية وبمزيد من تفتيح المُخ نجح في الخدمة بالجيزة لفترة كانت كفيلة بإعادة الـ55 ألف فى عامين لا أكثر. اشترى أشرف بيه قطعة أرض في قرية اسمها المنوات بالجيزة كما اشترى شقة فى شارع العشرين بفيصل. يُعتبر كلب الأسفلت من مخضرمي سالومه الأقرع؛ أي أنه حضره وهو "سالومه" وأيضًا وهو "سالومه الأقرع".. كالابالا يوبخ سالومه الأقرع لأنه "مزعل" كلب الأسفلت و"مش بتراضيه زي زمان" صرخ بي سالومه -بعد أن اشترى شريط دعاء ليلة القدر للشيخ محمد جبريل من أمام مسجد الاستقامة-:- شفت؟؟ أهو جه الزمن اللي نعمل فيه اعتبار لزعل كلب الأسفلت.. والله الذي لا إله غيره.. لو كان كالابالا قالي الكلام ده من كام سنه لكنت تاويت الكلب ده. أنا بدفع كارتة مُجمعة آخر السنة وماحدش له حاجة عندي. ويبقى يوريني هيعمل إيه.كان سالومه قبل العمرة يدفع الكارتة المجمعة ويدفع لكلب الأسفلت 100 جنيه آخر كل شهر، ويحصل في مقابلها على عدد من الامتيازات، منها على سبيل المثال لا الحصر


- لسالومه الحق فى أن "يحمِّل" ميكروباصه في أي مكان بالميدان ولا يشترط أن يكون بالموقف


لسالومه الحق فى ألا يضع حزام الأمان


لسالومه الحق فى تقطيع المسافة.. فبدلاً من جيزة- مشعل. فيمكنه أن يصل بسيارته إلى الطالبية أو حسن محمد أو التعاون بنفس الأجرة، ومن التعاون يُعيد تحميلها ثانية إما إلى الجيزة أو إلى مشعل/حسب الغزالة


لسالومه الحق في الاتصال بكلب الأسفلت 24 ساعة كهوت لاين في حال مواجهته لكلاب أسفلت أخرى على السكة.. يُعطى المحمول للكلب ثم يمر


إذا دفع سالومه مائة وعشرين جنيهًا في الشهر فإن لسالومة امتيازًا إضافيًا، وهو:- سالومه غير مُدرج فى جدول العجل اللى بيتاخد مأموريات


أما إذا دفع مائة وأربعين فإن الدنيا زهزهت مع سالومه ويمكنه أن يسير بدون رخصة


وفي المقابل هناك بعض الحقوق الأدبية -غير الملزمة أحيانًا- لكلب الأسفلت، ومنها


كلب الأسفلت يركب من غير أجرة


حريم كلب الأسفلت يركبن من غير أجرة


أخوات وأقارب وجيران حريم كلب الأسفلت يركبون من غير أجرة


اللي "مظبطين" حريم كلب الأسفلت يركبوا من غير أجرة


لكلب الأسفلت وحريمه الحق –وقت اللزوم- في استعمال الميكروباص عربة ديليفري لتوصيل الخضار واللحم والخبز


بعد انتهاء الوردية يُمكن لكلب الأسفلت أن يأخذ سالومه مشوار عشان يجيبوا مصلحة


أعاد سالومه الأقرع تلك الحسابات واتخذ قراره، وجدته أمامي يسألنى:- هيّ مش الرشوة حرام؟- آه.- أنا تبت يا عم، بس كلب الأسفلت مش هيرحمنى وبعتلي على المية جنيه مع كالابالا.- ولو ما دفعتش هيعمل إيه؟- هيعمل حاجات قلة أدب، وإحنا معانا حريم فى العربية. ده غير إنه هيوزع نمرة الميكروباص على كل الكلاب زمايله.. ومش هعرف حتى أجدد من كتر المخالفات.- طب ما تشتكيه.- قلبك أبيض يا شيخ
بعد ذلك التاريخ بثلاثة أشهر جمعتني الصدفة بشخص شديد الشبه بسالومه في جامع عمرو بن العاص. لكنه كان أنحف وأغمق وأعرج. صرخ بي:- مش دي شورتك؟- أنا جيت جمبك إنت مين يا عم؟- أنا سالومه.. مش قلتلي اشتكي. آديني جاي أشتكي.. مافيش أرحم من ربنا على عباده. قادر يخلصني من كلب الأسفلت.حكى لي شاهين بعدها أن روح سيادة القانون تلبست سالومه فانطلق إلى قسم العمرانية يتهم أشرف بالبلطجة، وانطلق إلى إدارة مرور الجيزة، وانطلق إلى مديرية أمن الجيزة، وانطلق إلى وزارة الداخلية.. طبعًا كل هؤلاء انطلقوا وراءه بعدها فهو المدمن السوابق -الملتحي حاليًا- وليس من المعقول أن يصدقوه ويكذبوا "أمين" شرطة لم تصدر ضده أي شكوى

خرج من القسم وجد سيارته مسحوبة الرخص وعليها مخالفات بأربعة وثلاثين ألف جنيه. قال لي شاهين إن سالومه استفتى أحد الشيوخ في قتل كلب الأسفلت ولمّا علم أشرف بالأمر ذهب إليه وعرض عليه التصالح فرفض سالومه قائلاً بعنفوان:- بيني وبينك وزير الداخلية، ولو مانصفنيش هروح لرئيسه ولو مانصفنيش هروح للريس شخصيًا ولو مانصفنيش هروح للبيت بيتك.- أنا كده يا شيخ سالومه عملت اللى عليّ عشان ما تركبنيش حق

بعد هذا التاريخ بستة أشهر جمعتني الصدفة بشخص شديد الشبه بالشخص الذى قابلته في جامع عمرو.. كان أقصر وأسود وبدون لحية أو أسنان.. صرخ في:- مث أنا لثه جاي من البيت بيتك.- طب اقعد استريح يا حاج.. صلي كده على النبي وقولي انت مين الأول.- يا عم أنا ثالومه الثواق بتاع الجيزة.. نثيتنى؟؟صرخت:- يا نهار أثود.. ثالومه؟! مث ممكن.- اثبر بس.. وحياة ربنا ليثيبها بفضيحة.. أنا مث هثيبه


طبعًا بعد هذا التاريخ توقفت عن الذهاب إلى جامع عمرو إلى أن وجدته في الموقف بالجيزة واقفًا على الرصيف يصرخ:- الله أكبر.. الله أكبرووجدته يوزع كسكسي وبليلة بالكنافة على السواقين، وعرفت أثناء هذا أن أشرف بيه نقلوه من الجيزة للصعيد.. رأيت ميكروباصه وقد عادت للخط وكتب عليها:الحمد لله المتين ومش هدفعلك يا سيادة الأمين


16 comments:

enjy said...

وااااااااااااااااااااااااااو

enjy said...

بقالى فترة بلف هنا فى المدونة ومستمتعة جدااااااااااااااا جداااااااااااا جداااااااااا انت بجد تحفة وبتحكى حلو اوى والله
سلام عشان اروح اكمل

lina nabulsi said...

يا خرابي عليك مالهاش حل ...مجرمة رسمي برغم إنى فى لحظات كنت بتوه بالهوى هو الكلام دة بجد ...بس مضطرة أسفة أصدقك ....
عمومآ أنا عندى نسخة من سالومة لو إحتجتها إبقى قولى ...
و امانة يا شيخ تاخدها و تخلص أمى ...
هههههههههههههه
هستنى حاجات تانية

أسماء علي said...

سالومة و حكايته
رائعة جدا
التفاصيل محكية بطريقة رائعة
:)

الدرعمي said...

أبدعت و جودت .. مازلت مصرا على أنك متقن محترف و لك جد حكاء ورثت عنه حلاوة السبك و جمال الحبك و إتقان الدخول و الخروج و الانتقال في الخلال .. أنت سيناريست متميز و سيكون لك شأن عظيم فاتبع نبوءتي و صدقني و اجتهد أكثر و إن شئت فكثف و خفف من اللهجة فذاك أولى @ تحياتي لسردك و إبداعك الذي أمتعني @ ليتك تشرفنا بزيارة @ آدم الدرعمي

إسماعيل وهدان said...
This comment has been removed by the author.
أسما عواد said...

هاي
مريت عشان أمسي
مسا الفل
يا جميييييييييييل

dr.heba said...

u r great

أسما عواد said...

هالووو
انت فين يا محمد
مفيش بوست جديد؟

Memo said...

مش عارفة مع احترامي لسلومة بس انا نزلت مكتبة الشروق امبارح لقيت كتاب مكتوب فية اسم حضرتك في كلام من مدونتي

؟؟؟؟؟
فين الملكية الفكرية
وفين حقوق النشر الخاصة بمدونتي
وفين ارباح الكلام دة
وفين البسكلتة اللي على الكتاب
وفين الحمستاشر جنية اللي هاشترية بيهم

Memo said...

معلش افهم بس الموضوع دة سبوبة ولا هتدفعوني فلوس
عشان لو هتدفعوني فانا معرفكش و البلوج دة مش بتاعى لكن بقا لو سبوبة تبقا كدا الحكاية فيها كشري و شاي بالنعناع ونغنغة
يعني و يا سلام بقا لو معاهم حتت صابونة بريحة
اوعدنا يا رب

Memo said...

انا مليش دعوة انا عايزة فلوس
انا حسبت حسباتي لقيت ان يطلعلي في الكتاب بتاع ربع جنية
عارف يعني اية ربع جنية
يعني نص كيس سيبش
يعني نص اجرة ميكروباص
يعني ربع قزازة بيبس
يعني ربع كيلو قوطة
انت عايزني اتحرم من الخير دة كلة لية

ولا اقعد ادانا اضرب واكتب في مدونات وفي الاخر تاكل انت الكشري
والقوطة
اعطينا من ما اعطاك الله يا اخي

salma said...

i like it soo much
to decribe u no world
"2n7any 27taraman w takdeeran"
thanks MRS MOHAMED

Mohamed Kamal Hassan said...

enjy
يا فندم متشكرين وأخجلتم تواضعنا
ويارب الجاى يعجبك برضه
(:
ـــــــــــــ
لينا
ههههه
كله كوم ولما الحظ يجمعك بسالومة كوم تانى
هم موجودين كتير على فكرة
اللى بيركب ميكروباظات بيشوفهم
ــــــــــــ
أسماء على
ربنا يخليكى وأتمنى اللى جاى برضه يبقى رائع
(:
ــــــــــ
الدرعمى
ومازلت مصرًا على دهشتى من إعجاب درعمى بكتاباتى
(:
شكرا بجد على اهتمامك بكتابتى
ــــــــــ
إسماعيل وهدان
أتمنى من كل قلبى إن الجولة فعلا تكون عجبتك
ارسل للدار على
dar.mazeed@gmail.com
ـــــــــــــــ
هبة
متشكرين
(:
ــــــــــ
أسما عواد
أنا موجود
بس اللى جاى محتاج هدنة شوية
ــــــــــــــ
سلمى
انتى من الناس اللى بتخلينى أتغر
الله يسامحك
(:

Mohamed Kamal Hassan said...

enjy
يا فندم متشكرين وأخجلتم تواضعنا
ويارب الجاى يعجبك برضه
(:
ـــــــــــــ
لينا
ههههه
كله كوم ولما الحظ يجمعك بسالومة كوم تانى
هم موجودين كتير على فكرة
اللى بيركب ميكروباظات بيشوفهم
ــــــــــــ
أسماء على
ربنا يخليكى وأتمنى اللى جاى برضه يبقى رائع
(:
ــــــــــ
الدرعمى
ومازلت مصرًا على دهشتى من إعجاب درعمى بكتاباتى
(:
شكرا بجد على اهتمامك بكتابتى
ــــــــــ
إسماعيل وهدان
أتمنى من كل قلبى إن الجولة فعلا تكون عجبتك
ارسل للدار على
dar.mazeed@gmail.com
ـــــــــــــــ
هبة
متشكرين
(:
ــــــــــ
أسما عواد
أنا موجود
بس اللى جاى محتاج هدنة شوية
ــــــــــــــ
سلمى
انتى من الناس اللى بتخلينى أتغر
الله يسامحك
(:

Yomna Moussa said...

هااااى انا اول مرة ادخل هنا (مدونتك) و اذا حد بيسأل عرفتها منيين فهقوول من المدونة الجباارة التحفة (قهوة المصريين)اللى ليها سنتيت نازلة! اعرف
بس اعمل ايه دايما كده عندى فرق توقيت :) انا حبيت بس اعبر عن مدى اعجااابى الشديييييد و اوصل تحياتى الاشد لاحلى أبو كمال
:)